雲高爾落定柯打 紅魔簽硬3德國兵

睇嚟雲高爾都做硬曼聯新領隊嘞！英媒爆料，佢下周初就會簽約，而且佢諗住將曼聯德國化，據報佢已經向曼聯班高層「落柯打」，幫佢喺今個夏天買入卻奧斯、馬高列奧斯同埋曉姆斯3位德國兵。


料周三入魔傑斯做教練
英國《每日郵報》透露，雖然雲高爾仲未同曼聯簽約，但曼聯已經當佢係下任領隊，問埋佢要買咩人。雲高爾已經分析過曼聯嘅陣容，覺得紅魔好需要3名德國球員。由於卡域克年紀大，加埋其他中場又唔夠班，所以雲高爾想要拜仁慕尼黑嘅卻奧斯嚟做中場指揮官。雲高爾又嫌曼聯班翼鋒突破能力唔夠，佢就要求曼聯幫佢簽多蒙特嘅馬高列奧斯返嚟！仲有，隊長尼曼查維迪落實下季轉投國際米蘭，曼聯個中堅位都等人用，雲帥希望簽到多蒙特嘅曉姆斯！
嘩，如果簽晒就正囉，我求大俠身邊啲曼迷朋友聽到都流晒口水咁！不過，以曼聯行政總裁活華特喺對上兩個轉會窗嘅拙劣表現，我求大俠都唔敢期望太高。
英媒仲話，雲高爾同曼聯嘅談判都到最後階段，相信可以喺下星期三前落實。雙方喺人事上有少少分歧，雲高爾希望可以帶自己嘅教練嚟，曼聯就想傑斯留喺度幫手。報道話，雲高爾唔會企硬，准許傑斯留喺教練團入面，但喺咪做副手就未知。其實雲高爾好想快啲落實件事，等佢可以專心帶荷蘭踢世盃。原定荷蘭會喺周五宣佈世盃大軍名單，但足總突然話延遲到下周一先公佈。雖然荷蘭足總冇講到原因，但外界估計雲高爾仲煩緊下季教曼聯嘅事。

[img]http://static.apple.nextmedia.com/images/apple-photos/apple/20140502/large/aa0301b.gif[/img]

[img]http://static.apple.nextmedia.com/images/apple-photos/apple/20140502/large/02s3-405p.jpg[/img]
■荷蘭比賽時，尹佩斯老婆（左）同雲高爾老婆（右）會一齊去睇波。互聯網


朗尼擔心隊長位不保
雲高爾教曼聯，唔少曼聯球迷都歡迎，但係朗尼就唔想喎。英國《地鐵報》指，朗尼向曼聯高層表示，反對雲高爾做領隊。朗尼擔心雲高爾唔畀佢做隊長，影響到佢喺更衣室嘅地位。我求大俠聽聞，尹佩斯同雲高爾兩家人好老友，佢兩個嘅老婆仲成日約埋去倫敦shopping，所以難怪朗尼擔心地位不保。

[img]http://static.apple.nextmedia.com/images/apple-photos/apple/20140502/large/aa0301a.gif[/img]


來源:蘋果日報網站